مفضلاتي...واخيرا :)

السلام عليكم 

يووه يازين المدونه من زممممان عنها :(،احس اشتقت للكتابه فيها،المشكله الفتره اللي راحت عطله طبعا انا دايم معطله :) اخواني ف مستغله كل الوقت معهم قبل يبدون دراسه:(،يوم بدون فضيت :) المهم بكتب مفضلاتي للفتره الاخيره وكلهم اشياء جديده تقريبا 

مسكرة سيفورا 

دايم اقرا عنها ريفيوات انها بطله بس للامانه ماتشجع اجرب منتجات سيفورا،مدري ليش ماحبهم وانا ماجربتهم اصلن،المهم جيت احاسب بسيفورا والاالقى الميني منها قلت خل اجربها ،دام صغيره ،اول شي اشوف حجمها حلو  تكفيني استخدام شهر تقريبا ، وتكفي ان تاخذون القرار ان حلوه او لا :) بعض الماركات اللي يوفروت منتجات صغيره تكون نتفه نتفه مايمدي الامره او مرتين تجربونهم ، حبيتها جدا جدا تعطي رموشي طول وكثافه ، الاسبوعين اللي فاتو اي ميك اب احطه احطها معاه اما ميك اب خفيف او ثقيل اشوفها تنفع ، واهم شي ماتكتل بعض المسكرات اول كم استخدام تكتل بعدها تضبط ، هذي لا تمام 

ف اللي حابه تجربها خل تشتري الحجم الصغير منها 

اخذتها من سيفورا سعرها ب ال ٤٠ ريال 

قلوسات ميك اب فور ايفر

احس الارواج المات طلعو من خشمي خلاص :) ، تقريبا سنه وحنا بس مات مات مات خلاص احس طفشت منه ، فيه بنات مايحبون القلوس انا كل الانواع احبهم عادي ، بالعاده القلوسات تكون خفيفه ماتعطي لوون لشفايف كامل يكون اللون خفيف ، ذولي لا اللون يغطي كل الشفايف ، ذكروني بحقات ديور ،انا حبيت اكثر شي اول ٣ اللوان واللي لونه بنفسجي كذا   لونه غريب ، بنفسجي مدري وشو ، بالعاده انا كل اللواني لحميه او درجات العنابي ، اول مره احب لون كذا ، واتقبله علي :) 

وهذا سواتش لهم 

اهم شي الاسود :) 

اسعارهم ماعرفها لان وصلني منهم 

تحصلونهم بفافافوم او بسيفورا او اي مكان فيه ميك اب فور ايفر

برونزات من توفيسد

انا من اول ماشفته طلبته على طوووول ، لان ماجربت ولابرونز من عندهم ،ف هالبوك او هالمنتج خلاني اجربهم كلهم وكمية كل منتج كويسه ،ينفع للاي ماعندها ولابرونز وحابه تجرب ، هذا زي مانتم شايفين كل درجات البرونز مات وب لقتر اللي بقلتر ينفع ك اضائه او بلشر مع الميك اب البرونز، وسعره جدا رخيص ، وريحتهم جمممميله ،واللي جذبني اصلن شكلهم كيوت 

ترا السوفت بوكس حقي خربان ف كل الصور معدله بالاضائه الا ذي اذا عدلت تروح اللوان البرونز مايبونون كويس :( بس بصورها بالسناب اوضح

سواتش للالوان 

انا طلبته من موقع بيويتي 

ماتوقع متوفر عندنا بالاسواق 

بيبي كريم من ايتود هاوس

الفتره اللي راحت مسكت معي الابيبي كريم، لان صايره اغلب طلعاتي او المشاوير بس كونسيلر ومسكرا ف كنت احتاج بيبي كريم يعطيني توحيد لون ، وشكل بشرتي تككون احلى ، حبيت اجرب بيبي كريم ايتود هاوس لان اثق ف هالماركه كثير،اول شي اشوفه مايغطي ابدا ،بس عطاني شفتو لمعة البشره الصحيه حقة النظاره كيف <<ادري ماعرفت اوصف :) هو كذا ف هذا اللي كنت احتاجه للميك اب البسيط ، تحمست معاه ورحت طلبت بعد كذا بيبي كريم من نفس الماركه بس لسى ماوصلوني ،واي نسيت بشرتي مختلطه ف مادهنت بشرتي معاه كانت تمام 

 + اكتبو لي البيبي كريم اللي جربتهم وحبيتهم 

انا طلبته من امازون 

وتحصلونه عند التاجرات 

عطر       من فكتوريا سكرت 

ريحته يعطيني احساس نظافه مع انوووثه،وثباته يعتبر جيد مو ثابت مره ومو ساعتين ويطير لا يعتبر كويس بالنسبه لسعره لان عطورتهم رخيصه، مراح اقدر اوصفه بس جربوه اذا مريتو المحل ,واول تجربه لي بعطورهم بس حبية حمسني للباقي 

اخذته من محل فكتوريا سكرت 

ماذكر سعره بس كان رخيص

وبس وبكذا خلصت اللي جربتهم جديده  كنت حقيقي حابتهم 

اللي جربت اي منتج فيهم تقول لنا رايها فيهم