طريقة الطلب من النت

السلام عليكم 

اسعد الله مسائكم بكل خير :) 

قبل كم يوم بالنستقرام كتبت لكم ان اذا مواثقين بالمحلات والتاجرات عشان الاصلي والتقليد 

اطلبوها من موقعها الاصلي 

وكثير بنات مايعرفون يطلبون 

ف وحده من متابعاتي الله يسعدها يارررب 

قالت لي ان بتشرح لكم الخطوات وانزلها بالبلوق 

وهذا الموضع كله شرحها الله يعطها العافيه 

تعبنها معنا 

بشرح لكم أهم خطوات التسوق من النت بمعنى انها الخطوات الأساسيه لعالم التسوق اللا محدود:

- حبيت أفيدكم بشي سهل يريحكم من الوسيط الألكتروني او من الغش التجاري اللي نشوفه من البعض يجيبون شي تقليد على انه اصلي واغلبكم ملعوب عليه فاليه ما نكون احنا نخدم نفسنا بنفسنا ونجيب شي عارفين انه اصلي ومن موقعه بعد،، 

الأشياء اللي نحتاجها :

١- بطاقة ائتمانية.

٢- بريد أمريكي .

- البطاقة الائتمانية اللي استخدمها مسبقة الدفع من البنك الأهلي طبعا عندكم اغلب البنوك يوفرون هالبطاقة 

ليش قلت (مسبقة الدفع) لأنك تشحنينها بقيمه طلبك بس و أئمن لك  لأن بعض المواقع تسحب من بطاقتك او بمعنى بعض المواقع تسرق من نفس البطاقه .. أنا الحمد لله ما صارت لي لاني اشحن بطاقتي بقيمة طلباتي بس صارت لبعض البنات ..

البطاقه برسوم  ١٠٠ ريال كل سنتين تقريبا تجددينها هذا بالنسبه للأهلي ما عندي خلفيه عن البنوك الثانيه.

- فيه خطوة مهمة في عالم التسوق اللي هي الدفع من خلال الباي بال (paypal) ليش الباي بال؟! لأنه يوفر لك التسوق الآمن وتقدرين تسترجعين فلوسك + يحتفظ بمعلوماتك بكل سرية وما يحتاج تسجلين معلوماتك كل شوي + سرعة السداد والايداع للمواقع ... 

طبعا بعد ما نطلع البطاقة الائتمانية نروح نسجل بموقع الباي بال ...( كثير مواقع شارحين خطوات التسجيل بالصور في قوقل اتبعوها بدقه ) طبعا بيكون مرتبط بأيميل لازم يصير ايميلك محقق وتعرفين الباس وورد حقه لان كل ما دفعتي بيطلب ايميلك والباس وررد احفظيه زي اسمك ...

- البريد الأمريكي ، كثير من الشركات عندهم هالخدمة مثل أرامكس - فيدكس - البريد الممتاز

بفيدكم باللي أنا مجربته .. أشتركت ببريد أرامكس شوب اند شيب الاشتراك ب 45 دولار تقريبا بعض المواقع يعطونكم كوبون ويصير ب 5 دولار والاشتراك ترا لمدى الحياة ويكون لك اكثر من عنوان بريد في اغلب الدول ..

مرتاحه كثير لخدمة ارامكس 4 سنين اطلب من خلالهم ولا قد صار ضرر لطلباتي + قبل تطلبين غرضك شوفي كم وزنه واحسبيه في الحاسبه بموقع ارامكس وبتعرفين كم بيكلفك طلبك مع الشحن + سرعه في التوصيل ويوصل لك لحد باب بيتك

ما جربت فيدكس او البريد السعودي لان البعض يشتكي منهم يمكن فيه عيوب بأرامكس بس ما صادفتني مشكلة معهم 

ولك حريه الأختيار في اي شركة تبغينها بس نصيحه البريد السعودي لا تشحنون فيه ميك اب لانه بيجيكم متدمر.. 

- نقطه مهمه اللي بتقول الشحن غالي من برا ومدري ايش عزيزتي هو يعتمد على طلبك ووزنه ما يتعاملون على ماركته او شكله اهم شي عند الشركات الوزن بعدها تتحدد قيمة الشحن لك .. غير كذا قيمه الكيلو من شركة لشركة يفرق مبلغ بسيط جداً ...

بعد خطوة البطاقه الائتمانية و البريد نجي لأهم نقطه اللي هي كتابه عنوانك في المواقع..

طبعا لما تبين تطلبين من موقع معين يطلب منك التسجيل بعد ما تخلصين التسجيل لازم تكتبين عنوانك في my address

تحصلينها في بروفايلك بالموقع اللي مسجلة فيه واغلب المواقع تجي بهالطريقه المبينه بالصوره .. الا بعض المواقع مثل المواقع البريطانيه يختلف كتابه عنوانها عن الامريكيه .. 

كيف تعرفين عنوانك!! 

تدخلين في حسابك مثلاً في شركة ارامكس  بتحصلين عنوانك  انسخي والصقي نفس اسمك المكتوب بعنوانك البريدي  لا تغيرين عن المسجل بشركة الشحن نهائي ،،، طبعا نفس الخطوات اللي بالصوره الرمز والشارع الخ.. .

نجي للمواقع طبعا على حسب احتياجك فيه مواقع شامله لجميع الماركات من الأكسسوار الى الملابس 

وفيه مواقع خاصه للماركة نفسها 

وقبل تطلبين خذي لك فره للمواقع وقارني الأسعار وبعدها اطلبي...

- المواقع الصينيه احذري ثم احذري منهم لانهم بأختصار حرميه الا إذا كان الدفع من خلال الباي بال هنا تطمني ما يقدرون يسرقونك...

- موقع ايباي ebay هو عبارة عن باعه كل بائع بجنب اسمه وسام ونجوم اذا تقييمه عالي اشتري منه اما اذا قليل يفضل ما تشترين منه ،،، نقطه مهمه ترا يبيعون مستعمل يعني قبل تشترين السلعه بتلقين جنبها مكتوب إذا جديدة او مستعمله 

نقطه مهمه ثانيه ترا الموقع ما يجمع طلباتك إذا بتشترين من كذا بائع كل طلب بيجيك بشحنه لحالها ( بتكلم عن شركات التجميع ان شاء الله ) ،،،

- بعض المواقع تعطيكم هدايا وكوبونات تخفيض بحيث لما تطلبون مره ثانيه تحطون الكود وتتخفض القيمه .

- موقع اربن ديكاي ما يقبل طلبك الا لما تكلمينهم فون اللي لغتها كويسه بتستفيد من الموقع وعندهم قانون ما تقدرين تاخذين كميات كبيره يعني للزبونه عدد معين لكل قطعه ،، طبعا فيه مواقع شاملة تحصلون فيها الماركة هذي.

- موقع سيفورا اختصر لكم ما يقبل بطاقتنا  يعني ما نقدر نطلب منه الا ببطاقه امريكيه بعض المواقع كذا ما يقبلون بطاقتنا او بريد ارامكس ... 

- موقع الدرق ستور هذا انصحكم فيه موقعين بموقع واحد الاول للميك اب اللي بالصيدليات والمكملات الغذائيه 

والثاني ميك اب ماركات عالميه واشياء ثانيه ادخلوه واكتشفوه بنفسكم ..

- أمزون هو موقع شامل لكل شي عبارة عن متاجر كل متجر عنده شي بس لاحظت ان بعض الاشياء اللي عنده اغلى مثلا من ايباي ،،، 

-- المواقع كلها لهم ايام بالسنه يسوون عروض وتخفيضات خصوصا البلاك فراي دي قبل السنه الميلاديه الجديده ترقبيه تطيح عليك نص قيمه السلعه 

-- لما تسجلين بالمواقع يرسلون على بريدك عروضهم وتخفيضاتهم ..

شيكوا على المواقع اللي بالصوره تختصر عليكم كل شي ،، واللي عندها مواقع نقدر نستفيد منها تكتبها وتكتب تجربتها

اختصرت قد ما اقدر علشان اسهل عليكم عملية التسوق اذا انا ناسيه شي فأعذروني ،، فقط ابي تدعون لي إذا استفدتوا مني ومشكوره يا شوق لانك خليتيني اساعد البنات بشي بسيط