من كم يوم كاتبه هالتدوينه بس تو افضى اصور وانزلهم
كل عام وانتم بخير ، ويارب تكون سنه حلوه عليكم وتتحقق كل احلامكم
الحمدلله 2015 كانت سنه انجاز وحققة من احلامي ، بالهمه والايمان بالذات راح تحققون كل احلامكم
بس تفائلو واشتغلو على كل حلم بشي صغير لما توصلون للحلم الكبير
مفضلاتي ل ٢٠١٥
هي منتجات تعرفت عليها ف هالسنه واستخدمتها تقريبا طول السنه او من اول ماشريتهم وانا استخدمهم
نبدا بمنتجات العنايه
اول شي مجموعة الصابون الافريقي
استخدم الشاور جل واللوشن وكريم اليد والصابونه، اكثر شي مبسوطه عليه ريحة المجموعه جممممميله ،الصابونه من زمااااان استخدمتها وتكلمت عنها هينا والنستقرام بعد ،مره حابتها انا بشرتي مختلطه مانشفت بشرتي ابدا لان دائما الصابون ينشف البشره هذا ابدا ،الشاور جل اكثر شي حابته لان فيه زي الحبيبات تسوي تقشير خفييييف حق كل يوم ، بيتنا كله صار يستخدمه :) وريحته جممميله وماينشف بشرة جسمي ابدا ابدا علبته كبيررره هالعلبه لها شهرين عندي كل يوم اتسبح فيه توه قبل يومين يخلص من كثر ماحبه عندي منه ٤ غيره احتياط:) ،اللوشن ثقيل ف للشتاء كويس يرطب بعمق بس عيبه يطفشني لين يطلع من العلبه لان متماسك شوي ، كريم اليد هو اللي بشنطة دائما وهذي ٣ علبه استخدمها ترطيبه حلو لليد ومايدبق ابدا هذا اهم شي
بديل الزيت من لوريال من مجموعه لوريال إلفيف
بتركيبة ٦ زيوت مستخلصة من الزهور " تغذي ألياف الشعر من فروة الرأس،تندمج مع شعرك لليونة مطلقة، تلمع شعرك بلطف للمعان فريد.
تعريف الماركه بالمنتج
بديل الزيت زمان جربت النوع اللي لشعر المصبوغ ،وكنت استخدمه وقت الشاور ، بس حده من متابعتاتي قالت لي
انا هي بعد الشاور تستخدمه ك سيروم :) عشان توضح الفكره ،، المهم ان احط منه شووووي مره وامسك شعري وارفعه على فوق <<زي زمان لما نبي نجعد شعرنا ههههههه اللي طبيعه شعرها اموج بيطلع اموج حلووو اللي بدون نفشه ومرتب مررره حبيته كذا ،واستخدمه وقت الشاور ك ماسك بس حبيت الطريقه الاول اكثر
تحصلونه بالصيدليات
عطر الشعر من مس ديور
ريحته اتوقع اغلبكم تعرفون ريحته رااااااايقه اانا احبها مره ،، هو مخصص لشعر
اخذته من دبي مو عارفه موجود عندنا او لا
كريم الرجل
انا اوفره بمتجري بس ماجربته ابدا ، اخذت امي واحد واشوف مررره حبته ، ف قلت لازم اجربه ، احلى شي ان تشفون الفرق بسرعه ويعالج تشققات القدم ، بس اهم نقطه مهما اهتميتو ف الارجل ومشيتو كذا بدون شبشب ماكان سويتو شي ابدا يروح التعب على الفاضي، المهم ان هالكريم قوامه شوي غريب بس حبيت النتيجه يومين بس وتشفون كيف التشققات تروح
اما تطلبونه او التاجرات
للميك اب
افضل ممنتج جربته بنظري
بودرة الحواجب من ايلامسكا ع ج ي ب ه ثابته بشكل ، وكميته كبيره ، حابتها جدا ، وكل ماخلصت اكيييد برجع اشتري منها ، اللي حابه بوده حواجب انصحها فيها
للاسف هالماركه مو موجوده عندنا بالسعوديه
برايمر ميك اب فور ايفر
تكلمة عنه كثثثير، هو مخصص للبشره اللي فيها مسام ويعبي الخطوط الدقيقه ، اي برايمر للمسام احطه بالطبطبه عشان يغطيهم طبعا البريمرات اللي مخصصه للمسام تتعب البشره لازمممم تتنظف كويس ، كلرسونك ينظف البشره زين من المكياج عشان كذا مرتاحه :) عموما ميك اب فور ايفر برايمراتهم دائما كويسه
تحصلونه بسيفورا ووجوه
كونسيرات
نارس وماك وميبلين
للحين افضل كونسيلرات جربتهم بالنسبه لي ، انا هالاتي غامقه ، ف لازم قبل اي كونسيلر كوركتر
نارس وماك تغطيتهم ثقييله ،نارس استخدمه بالايام العاديه عادي لان تغطيته قويه
اما ماك بس للمناسبات الكبيره لان ثابببت مايتحرك ابدا ويتحول لبودر ف مايحتاج اثبته
واكون واثقه ان باقي زي ماهو مراح يتحرك ،ميبلين استخدام يومي مرات استخدمه بدون كريم اساس ف يبين طبيييعي ويغطي لي الهالات ،ميبلين شريته اكثر من ٣ مرات كل مايخلص ارجع اشتري منه جدا حبته يومي او صباح وسعره جدا مناسب اللي حابه شي يومي وسعره حلو انصحها فيه ، واللي عندها هالات لازم قبله كوركتر عشان مايقلب رمادي عموما اي كونسيلر مهما كان وعندك هالات بيقلب ف لازم قبله كوركتر اورنج
نارس تحصلونها بدبي والكويت او اون لاين او تاجرات
ماك عندنا متوفر
ميبلين اون لاين او تاجرات
فيه منتجين نسيت اصورهم لحالهم
قلوسات ميك اب فور ايفر حبيتها لان اللون حقهم غني :) اغلب القلوسات تصير شفافه اللون بسييط بس هذا لا حبيتها نفس حقة ديور تقريبا و ومادبق ابدا
واللوانهم متنوعه
بيبي كريم وبرايمر للعين من بنفت
لونه على اصفر شوي احبه احطه للميك اب اليومي عشان يخلي لون الجف متوحد بس لاززم احط عليه شدو عشان يثبت وقت اكثر وفيه نسبه حمايه من الشمس
فيه منتجات كثير جربتهم وحابتهم بس حبيت اذكر المنتجات اللي ماقدر استغني عنها
اي من المنتجات جربتوهم وحبيتوهم
وقولو لنا المنتجات اللي جربتوها ٢٠١٥ ومراح تستغنون عنها وناسبتكم
ليست هناك تعليقات:
إرسال تعليق